Plantun de Prouvènço

Pèr coumpara dos planto d'encò nostre

Anacamptis papilionacea & Typha domingensis

Anacamptis papilionacea

Orchidaceae

Nom en français : Orchis papillon.

Descripcioun :
Aquéu canto-gau à flour de parpaioun trachis subretout au levant de Prouvènço. Se recounèis à soun casco rouge e sa labreto roso. De nouta que la planto en fotò èi la proumièro visto dins la Vau-Cluso.

Usanço :
Couneissèn pas d'usanço particuliero pèr aquelo planto qu'èi toujour proutegido.

Port : Erbo
Taio : 10 à 30 cm
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Anacamptis
Famiho : Orchidaceae

Coulour de la flour : Roso
Petalo : irreguliero
Ø (o loungour) flour : Pancaro entresigna
Flourido : Printèms

Sòu : Ca
Autour basso e auto : Pancaro entresigna
Aparado : Vo
Remarco : Meno aparado

Liò : Colo - Champ - Prado umido
Estànci : Termoumediterran à Coulinen
Couroulougi : Pancaro entresigna
Ref. sc. : Anacamptis papilionacea (L.) R.M.Bateman, Pridgeon & M.W.Chase, 1997

Paviho-rousso

Typha domingensis

Typhaceae

Àutri noum : Fielouso, Filouso, Masseto, Cire, Sagno.

Nom en français : Massette australe.

Descripcioun :
Coume tóuti li Typha, la paviho-rousso se recounèis à sis espigo femello e masclo. N'i'a cinq meno de Typha ; aquelo se destrìo, de segur de la coulour de l'espigo femello, rousso, mai peréu de si fueio pas trop largo e en mié-ciéucle en coupo, e tambèn de la loungour de separacioun entre li dos espigo (2 cm). Li fueio an d' auriheto gaire redouno au contro de T. angustifolia (vèire lou dessin).

Usanço :
Li fueio de paviho podon èstre utilisado pèr lou sagnage di cadiero e li flour pèr rempli li matalas. Se saup mens que li brout soun manjadis coume d'espargo. Se pòu faire de farino emé li racino e uno meno de pan emé l'agriero.